Golfmót klúbbsins var haldið á Svarfhólsvelli á Selfossi þann 6. ágúst sl. Þrettán kepptu um farandbikarinn okkar í mótinu. Veður var frekar risjótt, þurrt og logn og rauk upp í skúrir með hressilegum vindi af og til. Völlurinn var í góðu standi og allir skemmtu sér vel og létu smábleytu ekki trufla sig í að njóta dagsins. Mótið var punktakeppni með fullri forgjöf. Veitt voru verðlaun fyrir 3 efstu sætin. Einnig voru nándarverðlaun á öllum par 3 brautum. Verðlaunin voru gull, silfur og brons medalíur. Fyrsta sætið fékk aðalbúninginn, annað sæti varabúninginn og það þriðja gjafabréf frá Sportbarnum í Glæsibæ kr. 6.500. Góður félagi okkar, Ásgeir Jón Guðbjartsson átti leið til Leeds og fór í búðina á Elland Road og keypti fyrir okkur verðlaunin á mótið. Þökkum við honum kærlega fyrir þessa aðstoð við mótið.

Leikar fóru þannig að Leeds meistarinn 2010 er Tómas Birgisson en hann fékk 41 punkt. Óhætt er að segja að þetta hafi verið hans dagur því hann fékk tvenn nándarverðlaun einnig. Frábær árangur og óskum við honum til hamingju með sigurinn.

Klúbburinn vill þakka öllum þátttakendum fyrir skemmtilegan dag og hlakka til að sjá ykkur aftur næsta sumar.

Úrslit:

1. sæti: Tómas Birgisson, 41 punktur.

2. sæti: Kjartan Sveinbjörnsson, 36 punktar.

3. sæti: Ásgeir Jón Guðbjartsson, 32 punktar.

Nándarverðlaun:

3. hola: Tómas Birgisson, 7,52 m.

7. hola, Ársæll Ó. Steinmóðsson, 4.68 m

12. hola, Tómas Birgisson, 5.83 m

16. hola, Kjartan Sveinbjörnsson, 6,41 m

Besta nýting vallar:

Jón Grétar Hafsteinsson

ÁS